Hildur Björnsdóttir, oddviti Sjálfstæðisflokksins, hefur lítið álit kosningabandalagi Samfylkingar, Pírata og Viðreisnar. Hildur hefur haldið sér til hlés í umræðunni síðustu daga en í nýjum pistli á Facebook-síðu sinnar hjólar hún í áðurnefnt bandalag sem hún uppnefnir „þrjóskubandalagið“.

„Niðurstöður nýafstaðinna borgarstjórnarkosninga voru skýrar. Meirihlutinn féll með afgerandi hætti. Þeir flokkar sem stóðu utan sitjandi meirihluta fengu nær 60% kosningu. Kjósendur kölluðu eftir breytingum. Úr kjörkössunum birtist jafnframt skýrt ákall á breytt stjórnmál. Klækjastjórnmálum úr Ráðhúsi Reykjavíkur var hafnað. Nákvæmlega sömu klækjastjórnmálum og þrjóskubandalag Samfylkingar, Viðreisnar og Pírata beitir nú við meirihlutaviðræður. Bandalagið þráskallast við að halda völdum sem kjósendur vilja ekki fela þeim lengur – með útilokunum og þvingunum. Það getur tæplega talist upptaktur að farsælu samstarfi fyrir Framsóknarflokkinn,“ skrifar Hildur.

Þá bendir hún á að Einar Þorsteinsson, oddviti Framsóknarflokksins, og hans samherjar eigi aðrar kosti í stöðunni en að undirgangast slíkar „þvinganir“ en þar vísar hún til þess að Þórdís Lóa Þórhallsdóttir, oddviti Viðreisnar, sló aðrar hugmyndir en samstarf við Samfylkinguna og Pírata útaf borðinu og skyldi þar með Framsóknarflokkinn eftir með fáa leiki í stöðunni.

„Það eru margir möguleikar á borðinu við myndun meirihluta. Ekki síst ef flokkarnir velja að svara ákalli kjósenda eftir málefnalegum stjórnmálum og aukinni samvinnu um mikilvæg framfaramál. Sjálfstæðisflokkurinn er reiðubúinn til samtals við alla flokka um verkefni næsta kjörtímabils. Við gengum óbundin til kosninga, boðuðum breytingar og vorum heiðarleg gagnvart okkar kjósendum. Nú reynir á Framsóknarflokkinn – og auðvitað alla flokka innan borgarstjórnar – að hafa hugrekkið til að svara ákalli kjósenda eftir breyttum stjórnmálum,“ skrifar Hildur.