Samkvæmt frumvarpi til fjáraukalaga 2021, sem hefur verið lagt fram á Alþingi, hækka framlög til heilbrigðismála um 22 milljarða. Þyngst vega útgjöld vegna heimsfaraldurs kórónuveirunnar en þau nema 16 milljörðum.

Morgunblaðið skýrir frá þessu. Fram kemur að samtals nemi aukin útgjöld vegna heimsfaraldursins og afleiðinga hans 23,6 milljörðum.

Í frumvarpinu er óskað eftir heimild til að verja fjórum milljörðum í kaup á Hótel Sögu undir starfsemi Háskóla Íslands og kaup á jörðinni Mið-Fossum í Borgarbyggð vegna starfsemi Landbúnaðarháskóla Íslands á Hvanneyri.

Í frumvarpinu kemur fram að Hótel Saga verði keypt með Félagsstofnun Stúdenta og verði eignarhlutur ríkisins 73%. Stefnt er að því að nýta húsnæðið undir starfsemi menntavísindasviðs Háskóla Íslands. Með eigninni fylgir byggingarréttur sem verður hægt að nýta undir aðra starfsemi háskólans í framtíðinni.

Hvað varðar jörðina á Mið-Fossum þá á að nýta hana undir kennsluaðstöðu á sviði reiðmennsku og til að byggja upp aðstöðu fyrir tilraunir, kennslu og nýsköpun í jarðrækt.

Einnig er farið fram á 940 milljóna króna viðbótarframlag til fæðingarorlofssjóðs en ljóst er að greiðslur úr sjóðnum verða meiri á árinu en fjárheimild er fyrir. Ástæðan er að útgjöld vegna fæðinga á síðari hluta ársins 2019 eru hærri en ráð var fyrir gert vegna þess að hærra hlutfall feðra tekur fæðingarorlof á síðari hluta orlofstímabilsins en árin á undan.