„Þetta er spurning að hafa hér fullt af ferðamönnum og síðan allt of stóran hluta landsmanna í sóttkví,“ svona lýsti Kári Stefánsson, formaður Íslenskrar erfðagreiningar umræðuefni rifrilda hans og Jóns Ívars Einarssonar, prófessors við læknadeild Harvvard-háskóla. Jón lýsti rifrildum þeirra svona „Við erum að deila um hvort að heimkomusmitgát eða sóttkví sé áhrifaríkari leið og það er mjög lítið um gögn um það.“
Sjá einnig: Segir Kára fara í manninn frekar en boltann – „Eru þetta fordómar gagnvart konum?“
Sjá einnig: Kári tætir í sig prófessor við Harvard – „Upphafin meðalmennska“
Báðir voru þeir gestir í þættinum Silfrinu sem var á dagskrá RÚV í dag.
„Hann snýr allskonar hlutum á hvolf þessi ágæti maður,“ sagði Kári Stefánsson um Jón Ívar. Kári er á þeirri skoðun að best sé að beita ströngum reglum um landamæri Íslands. Með því fari líf fólks í eins eðlilegt horf og hægt er, þar geti börn farið í skóla og menningin blómstrað.
Jón Ívar vill frekar að fólk fari í heimkomusmitgát. Þá geti ferðamönnum fjölgað hér á landi. Hann segir að gögn um hvor leiðin virki betur séu af takmörkuðu magni, og að heimkomusmitgát ætti að njóta vafans.
Kári vill hins vegar meina að heimkomusmitgát sé ruglingsleg og stuðli að fleiri smitum.
„Ég er ekki að vanmeta nokkurn skapaðan hlut. Ef þú rekst á mann úti í búð sem á að vera í sóttkví veistu að hann er að brjóta sóttkví ef þú rekst á hann úti í búð og hann er í heimkomusmitgát hefur þú ekki hugmynd um hvað er að gerast.“
Jón benti á í þættinum að dánartíðni vegna COVID-19 sé talsvert lægri en haldið var í fyrstu. Kári benti aftur á móti á að gamalt fólk væri alls ekki með lága dánartíðni
„Hún [dánartíðnin] er 25 prósent hjá fólki yfir 85 ára. Meðalaldur Íslendinga eru 80 ár þannig að við erum með ansi stóran hóp af fólki sem er 85 ára og eldri og það væri dapurlegt að fara að taka upp ætternisstapa aftur og henda gamla fólkinu fram af hömrum. Það viljum við ekki.“
Jón sagði þó að einungis tíu prósent þjóðarinnar væri 70 ára eða eldra. Þá hitnaði í Kára.
„Þér finnst eins og það sé allt í lagi að opna landamærin af því að það séu ekki nema tíu prósent þjóðarinnar? Þetta er heimskulegt og þetta er ekki rökrétt!“
Harvard-prófessorinn tók þá skýrt fram að hann vildi ekki kasta þessu fólki frá borði, heldur vildi hann vernda þennan hluta þjóðarinnar sérstaklega vel.
Að mati Jóns er óraunhæft að halda að lífið muni ekki geta haldið áfram þangað til að bóluefni finnist.
„Það er óraunhæft að halda að lífið verði algerlega eðlilegt fyrr en bóluefni er komið og það verður búið að bólusetja stóran hluta þjóðarinnar. Þetta er eitthvað sem mér finnst að eigi bara að koma fram.“
Þá benti hann einnig á að stór hluti námsmanna væri að mæta í skólann og hélt því fram að í raun væru hömlurnar á lífi okkar ekki svo miklar. Því svaraði Kári:
„Ástæðan fyrir því að það eru ekki hömlur á okkar lífi er að við höfum haft tiltölulega stífar kringumstæður á landamærum,“
