Þingmaður Pírata, Björn Leví Gunnarsson, bendir á að ef ríkisstjórnin klárar fullt kjörtímabil, líkt og fjármálaráðherra vonast eftir, þá geti það gert það að verkum að ekki verði hægt að láta reyna á ráðherraábyrgð embættismanna þessarar ríkisstjórnar. Þetta skrifar hann á Facebook.
„Ein ástæða fyrir því að það eigi ekki að klára fullt kjörtímabil er vegna þess að ráðherraábyrgð frá 2013 fyrnist innan 6 mánaða ef kjörtímabilið klárast. Það eru fjölmörg atvik sem þyrfti mögulega að skoða m.t.t. persónulegrar ábyrgðar ráðherra skv. lögum um ráðherraábyrgð. Ef kjörtímabilið er styttra fyrnast þessi atvik ekki.“
Björn bendir á eftirfarandi ákvæði laga um ráðherraábyrgð nr. 4/1963 þar sem segir í 14. gr. :
14. gr.
Málshöfðun eftir lögum þessum getur eigi átt sér stað, ef 3 ár líða frá því, er brot var framið, án þess að Alþingi hafi samþykkt ályktun um málshöfðunina. Sök fyrnist þó aldrei fyrr en 6 mánuðir eru liðnir frá því, að næstu reglulegu alþingiskosningar, eftir að brot var framið, fóru fram.
Ákveði forsætisráðherra að klára kjörtímabilið og hafa kosningar að hausti 2021, fremur en að vori, líkt og hefð er á, þá gæti hún þar með komið í veg fyrir að embættismenn þessarar ríkisstjórnar verði látnir sæta ábyrgð á embættisfærslum sínum.
„Ef forsætisráðherra ákveður að klára kjörtímabilið þá er forsætisráðherra einnig að setja fyrningarhnút á þessi atvik. Að mínu mati væri það enn ein staðfestingin á samtryggingunni þar sem enginn ber ábyrgð og allir passa hvert annað.“
Forsætisráðherra mun boða formenn þingflokkanna á fund á næstunni þar sem rætt verður um mögulegan kjördag.
