Björn Leví Gunnarsson, þingmaður Pírata, styður ekki þá áróðursherferð sem Efling rekur vegna kjaradeilu sinnar við Reykjavíkurborg. Hann segir himinn og haf þar á milli:

„Þetta tvennt er ekkert það sama, þó félagsmenn Eflingar séu auðvitað láglaunafólk, þá er það tvennt ólíkt; félagið og starf þess og félagsmenn,“

segir Björn Leví sem sjálfur vann á leikskóla.

Styður ekki aðferðafræðina

Hann er ekki hrifinn af aðferðafræði Eflingar:

„Áróðursherferðin sem er í gangi núna er heldur ekki eitthvað sem ég get stutt. Þar kristallast kannski helst munurinn á því að ég styð láglaunafólk en ekki Eflingu. Á meðan ég vona að þau nái góðum samningum þá get ég ekki stutt aðferðina,“

segir hann og nefnir sérstaklega að tilgangurinn helgi ekki meðalið almennt séð:

„Vandamálið er að í stjórnmálum þá er meðalið oft ansi beiskt, jafnvel úldið, en fær að viðgangast í skjóli leyndarhyggju og falsks „trúnaðar“. Það er sífellt verið að búa til vettvang þar sem hægt er að draga fram öll vopnin; tilfinningarökin, útúrsnúninga, hótanir, … allt saman. Ath. að hérna er ég að tala almennt um stjórnmál en ekki núverandi kjaradeilu. Það er hins vegar margt sem ég sé sem slær á þær nótur í umræðunni. Þess vegna er ég efins, ekki um kjarabæturnar heldur um meðalið.“

Stuðningur háður skilyrðum

Björn Leví segir að stuðningur sinn við kjarabætur lágláunafólks sé ekki skilyrðalaus:

„Fólk sem spyr mig, „styður þú Eflingu“ og ætlast til þess að það sé samasemmerki á milli þess og að styðja láglaunafólk … nei og nei. Á meðan ég styð kjarabætur láglaunafólks þá þýðir það ekki að ég styðji það skilyrðislaust. Ég bara virka þannig. Ég geri mér væntingar um meiri styttingu vinnuvikunnar, áróðurslausa umræðu og betri kjör. Eins og ég sé þetta þá tikkar núverandi kjaradeila í eitt af þeim boxum. Gangi þeim sem allra best með það og betur með hitt.“

Skrif Björns Leví koma í kjölfar þess að fyrirhuguðum fundi Eflingar með oddvitum meirihlutans í Reykjavík sem halda átti í dag hefur verið frestað vegna ónægrar þátttöku, þar sem oddvitarnir þáðu fæstir boðið.

Sagði Dóra Björt Guðjónsdóttir, oddviti Pírata, að Píratar stæðu með láglaunafólki, og það hefði ekki staðið á henni að mæta á fundinn, en Efling hefur stillt kjarabaráttunni þannig upp að þeir sem ekki styðji Eflingu, styddu þar með ekki láglaunafólk.