Greint var frá því fyrr í dag að starfsmenn Reykjavíkurborgar hafi gerst brotlegir við lög um skjalavörslu og skjalastjórn í meðhöndlun þeirra á gögnum um braggamálið. Þetta kom fram í niðurstöðu frumkvæðisathugunar Borgarskjalasafns Reykjavíkur, hvers efni var rætt á fundi borgarráðs í dag. Hringbraut greindi fyrst frá málinu í dag og nú hefur miðillinn greint frá því að Reykjavíkurborg muni ekki kæra þessi brot á lögunum.

Óskar Jörgen Sandholt, sviðsstjóri þjónustu- og nýsköpunarsviðs, staðfesti þetta í samtali við Hringbraut en Borgarskjalasafn Reykjavíkur fellur undir hans svið. Óskar segist vera ósammála skýrslu Borgarskjalasafnsins um að lögbrot hafi átt sér stað þar sem sum gagnanna voru rúmlega 5 ára gömul þegar þau voru færð inn í gagnageymslukerfi borgarinnar.

„Þetta er bara viðtekið vinnulag, ekkert bara í þessu máli,“ segir Óskar. „Ég er ekkert að verja það, það hefði náttúrulega verið betri vinnubrögð að færa þessi skjöl reglulega inn. En það sem ég er að segja að þetta er ekkert óvenjulegt eða sérstakt í þessu sambandi.“

„Ef menn vilja túlka þetta sem lögbrot, ég held að það sé nú bent á það í skýrslunni að bæði Þjóðskjalasafn hafi gert sambærilegar athugasemdir út af starfsháttum hjá ríkinu og Borgarskjalasafn hafi svo sem gert þetta áður í svona úttektum hérna“.