Zenter rannsóknir gerðu könnunina fyrir Fréttablaðið sem birtir hana í dag.
„Ég sinni bara mínum störfum eftir bestu samvisku og bestu getu og er auðvitað þakklátur fyrir að njóta velvildar og stuðnings fólksins í landinu. Blessunarlega hafa Íslendingar yfirleitt verið sáttir við sinn þjóðhöfðingja þótt þeir hafi ekki allir verið steyptir í sama mót, eða kannski vegna þess.“
Hefur blaðið eftir Guðna um niðurstöður könnunarinnar.
Í nýársávarpi sínu tilkynnti Guðni að hann gefi áfram kost á sér í embætti forseta. Ef mótframboð kemur fram fara forsetakosningar fram laugardaginn 27. júní. Nýtt kjörtímabil forseta hefst þann 1. ágúst.
Samkvæmt niðurstöðum könnunar Zenter rannsókna þá er ekki marktækur munur á ánægju fólks með störf forsetans eftir aldri. Konur eru aðeins ánægðari en karlar og íbúar á höfuðborgarsvæðinu eru ánægðari en íbúar á landsbyggðinni. Ánægjan með störf Guðna eykst með hærri menntun og auknum tekjum.