Kristinn Hrafnsson, ritstjóri Wikileaks, fjallar um viðbrögð Sigríðar Á. Andersen, þingmanns Sjálfstæðisflokksins, við Samherjamálinu og meintum mútum fyrirtækisins í Namibíu.

Líkir hann viðbrögðum Sigríðar við þegar dæmdur nauðgari sem hann fjallaði um fyrir mörgum árum, sagðist hafa „lent“ í nauðgun:

„Fyrir löngu fjallaði ég í fréttaþætti um þekktan ofbeldisbrotamann og rakti hans dómasögu. Nefndi m.a. dóm sem hann hafði fengið fyrir að nauðga konu. Maðurinn var afar ósáttur.
„Mér fannst bara algjör óþarfi að rifja upp að ég hefði lent í nauðgun“, sagði hann. Datt þetta í hug við lestur pistils Sigríðar Á Andersen, þingmanns og fyrrverandi dómsmálaráðherra. Hennar viðbrögð við þætti Kveiks á grunni Samherjaskjalanna var áhyggjuefni yfir því að Samherjamenn hefðu verið neyddir til að greiða mútur í Namibíu,“

segir Kristinn.

Viðbrögð Sigríðar við þætti Kveiks voru eftirfarandi, er hún skrifaði:

„Þar var dregin upp dökk mynd af þeim kröfum sem namibískir ráðamenn gera til þeirra sem vilja stunda fiskveiðar við landið, þar á meðal til fyrirtækja í eigu Íslendinga.“

„Lentu“ í þessum aðstæðum

Kristinn segir Sigríði með þessu segja að Samherji hafi „lent“ í því að greiða mútur, sem hann yfirfærir á nauðgun. Að Samherji hafi aðeins verið að bregðast við kröfum sem settar hefðu verið fram:

„Þeir lentu í nauðgun. Með þessa siðferðissýn í málið skil ég betur að fyrstu viðbrögð sjávarútvegsráðherra og samflokksmanns hennar við Kveiksþættinum hafi verið að hringja í forstjóra Samherja með áhyggjur af líðan hans. Þorsteinn Már lenti jú í nauðgun í Namibíu.“