Björn Ingi Hrafnsson fyrrverandi útgefandi og borgarfulltrúi hefur gengið til liðs við nýtt framboð Sigmundar Davíðs Gunnlaugssonar. Segir Björn Ingi í færslu á Fésbók að hann hafi fengið mikil og góð viðbrögð við nýlegri Fésbókarfærslu þar sem hann hafi sagt að staðan í stjórnmálunum kalli á nýtt borgaralega sinnað framboð á miðju stjórnmálanna:

Nú hefur Sigmundur Davíð Gunnlaugsson sagt sig úr Framsóknarflokknum og boðað nýja stjórnmálahreyfingu. Í því felast vatnaskil að mínu mati. Ég fagna því mjög að við Íslendingar fáum aftur tækifæri til að kynnast framtíðarsýn hans sem stjórnmálaforingja, enda geta flestir verið sammála um þann mikla árangur sem náðist fyrir land og þjóð undir hans forystu á sínum tíma.

Björn Ingi var búinn að festa kaup á léninu samvinnuflokkurinn.is en svo kom það á daginn að Sigurbjörn Magnús Gunnlaugsson, bróðir Sigmundar Davíðs,  hefði fest kaup á léninu midflokkurinn.is. Heimildir Eyjunnar innan raða Sigmundar Davíðs herma að samningaviðræður hafi átt sér stað á síðustu dögum um samstarf þar á milli. Björn Ingi segir að samvinnufólk gangi með glöðu geði til liðs við Sigmund Davíð og hvetur hann fólk til að „vera með á miðjunni“ sem bendir til að Miðflokkurinn eða Miðjuflokkurinn gæti orðið endanlegt nafn á framboði Sigmundar Davíðs:

Fremur en að dreifa kröftum framfarasinnaðs fólks tel ég mikilvægt að sameina það með samvinnu að leiðarljósi. Samvinnufólk ætlar því glaðbeitt að ganga til liðs við nýja miðjuhreyfingu Sigmundar Davíðs — því það er verk að vinna og skammur tími til stefnu.