Stærð sveitarfélaga og laun bæjarstjóra virðast oft í litlu samræmi samkvæmt nýrri úttekt DV á launamálum þeirra. Meðallaun bæjarstjóra eru 1,6 milljónir króna á mánuði en launahæstur bæjarstjóra er Ármann Kr. Ólafsson, bæjarstóri í Kópavogi með 2,2 milljónir króna á mánuði þegar allt er tekið saman.
Dagur B. Eggertsson er með ríflega tvær milljónir króna í laun á mánuði þegar seta í stjórnum og nefndum er tekin með en borgarstjóralaunin eru 1.490.457 krónur á mánuði.
Aðeins Ármann og Gunnar Einarsson, bæjarstjóri í Garðabæ eru með hærri laun en Dagur. Ármann fær rúma 1,9 milljónir króna í laun og bifreiðastyrk en í Kópavogi búa ríflega 34 þúsund manns. Auk þess fær hann rúmar 317 þúsund krónur fyrir setu sína sem bæjarfulltrúi en það er misjafnt eftir bæjarstjórum hvort þeir þiggja bæjarfulltrúalaun eða ekki.
Gunnar náði ekki inn í bæjarstjórn sem aðalmaður og er því varamaður og fær af þeim sökun einungis greitt þegar hann tekur sæti á fundum bæjarstjórnar Garðabæjar. Hann fær hæstu föstu launin fyrir bæjarstjórastarfið, 2,1 milljón króna á mánuði. Í Garðabæ búa tæplega 15 þúsund manns.
