Chelsea hefur hafið viðræður um mögulega ráðningu Xabi Alonso sem næsta knattspyrnustjóra félagsins samkvæmt enskum miðlum. Lundúnafélagið vill ganga frá nýjum stjóra áður en undirbúningur fyrir næsta tímabil hefst og Alonso er sagður efstur á óskalistanum.
Spánverjinn tók við Real Madrid síðasta sumar eftir frábæran árangur með Bayer Leverkusen þar sem hann vann þýska meistaratitilinn taplaus tímabilið 2023-24. Tími hans hjá Real Madrid varð þó stuttur en hann var rekinn í janúar eftir erfiða byrjun.
Chelsea hefur fylgst grannt með stöðu Alonso síðan þá og telur hann henta vel þeirri framtíðarsýn sem félagið vinnur eftir. Forráðamenn félagsins vilja fá þjálfara sem getur þróað unga leikmenn og byggt upp lið til lengri tíma.
Fleiri nöfn eru þó einnig til skoðunar hjá Chelsea. Þar á meðal eru Andoni Iraola, Marco Silva og Oliver Glasner auk fyrrum Chelsea-leikmannanna Cesc Fabregas og Filipe Luis.
Fabregas hefur vakið athygli fyrir störf sín hjá Como á Ítalíu en Filipe Luis náði góðum árangri með Flamengo í Brasilíu áður en hann lét af störfum fyrr á þessu ári.
Chelsea vonast til að nýr stjóri verði ráðinn fyrir miðjan júní.
