Mikil samkeppni virðist vera að myndast um Jarrod Bowen, sóknarmann West Ham, sem gæti yfirgefið félagið í sumar jafnvel þó liðinu takist að halda sæti sínu í ensku úrvalsdeildinni.
Samkvæmt enskum miðlum hafa nokkur stórlið áhuga á enska landsliðsmanninum. Liverpool er sagt hafa fylgst lengi með Bowen og sér hann sem mögulegan arftaka Mohamed Salah á kantinum. Félagið vill styrkja sóknarlínu sína fyrir næsta tímabil og Bowen er talinn passa vel inn í leikstíl liðsins.
Newcastle hefur einnig áhuga á leikmanninum þar sem Eddie Howe hyggst bæta við fleiri sóknarmönnum í sumar. Þá eru líkur á að Anthony Gordon verði seldur og því þarf félagið mögulega að fylla það skarð.
David Moyes, stjóri Everton, er einnig sagður vilja fá Bowen til félagsins. Moyes þekkir leikmanninn vel en hann stýrði West Ham þegar Bowen var keyptur frá Hull City árið 2020 fyrir 22 milljónir punda.
Óvissa ríkir innan West Ham þessa dagana eftir að Karren Brady lét af störfum sem stjórnarformaður félagsins eftir sextán ára starf. Félagið undirbýr nú sumar þar sem búast má við miklum breytingum bæði innan vallar og utan.
