Ungir Píratar krefjast þess að íslensk stjórnvöld og Útlendingastofnun bæti aðstöðu flóttafólks og hælisleitenda hér á landi. Þetta ályktaði félagsfundur Ungra Pírata í gærkvöldi. Í fréttatilkynningu segir að fjölmiðlar hafi ítrekað sýnt fram á slæman aðbúnað hælisleitenda og flóttafólks og nú nýlega hafi Heilbrigðiseftirlit Reykjavíkur gert athugasemdir við aðstæður á Víðinesi þar sem hælisleitendur eru hýstir.

Ekki séu bara húsakynnin skemmd og skítug og maturinn kaldur heldur eru hælisleitendur einnig einangraðir á þessum stað og fólk sem hefur óskað eftir því að heimsækja fólkið fær ekki leyfi yfirvalda til þess:

Á Víðinesi er öryggisgæsla sem bannar allar heimsóknir jafnvel þó að heimafólk vilji fá heimsókn. Einnig er ferðafrelsi þeirra mjög takmarkað þar sem að einungis er boðið upp á eina ferð til og frá Víðinesi á dag. Þessi skortur á frelsi eykur einnig á einangrunina,

segir í ályktuninni. Er krafist svara um hvaðan þessar „úr sér gengnu og ómannúðlegu“ reglur komi. Segir að lokum:

Það er ekki boðlegt að láta fólk sem er að flýja stríð og óöryggi í heimalandi sínu búa hér á Íslandi við heilsuspillandi aðstæður bæði andlega og líkamlega. Lagið þetta, núna!