Bjarni Benediktsson forsætisráðherra og Benedikt Jóhannesson fjármála- og efnahagsráðherra hafa boðað til blaðamannafundar kl.14 í dag í Ráðherrabústaðnum við Tjarnargötu, verður almenningi kynnt tillögur sem miða að fullu afnámi fjármagnshafta. Kjarninn greindi fyrst frá þessu. Slakað hefur verið á fjármagnshöftum í nokkrum skrefum á síðastliðnu ári, hafa líf­eyr­is­sjóðir fengið auknar heimildir til að fjárfesta utan hafta sem og almenningur. Hefur Seðlabankinn áfram haft stíft eft­ir­lits­hlut­verk og ýmis tól sem hann hefur getað notað til að grípa inn í.

Fjármagnshöftin voru innleidd að nýju í nóvember 2008 til að bregðast við gengishruni krónunnar og koma í veg fyrir að fjármagn flæddi úr landinu. Unnið hefur verið að því á undanförnum árum að minnka eignir erlendra aðila í íslenskum krónum, þar á meðal með samkomulagi við kröfuhafa föllnu bankanna um að greiða innlendar eignir til ríkissjóðs í formi stöðugleikaframlaga. Greint var svo frá því í byrjun mánaðarins að fulltrúar stjórnvalda hefðu fundað með fulltrúum vogunarsjóða í New York, miðuðu fundarhöldin að því að kanna grundvöll samkomulags sem myndi gera vogunarsjóðunum kleift að flytja eignir sínar úr landi í skiptum fyrir gjaldeyri á hagstæðu gengi.

Viðsnúningur hefur verið á íslensku efnahagslífi frá hruni, Sigurður Hannesson, framkvæmdastjóri hjá Kviku og fyrrverandi varaformaður framkvæmdahóps um losun hafta sagði í nýlegri grein að hægt sé að losa höftin tafarlaust:

Sterk staða þjóðarbúsins og styrking krónunnar að undanförnu hefur skapað tækifæri til tafarlauss afnáms hafta.