Sigmundur Davíð Gunnlaugsson þingmaður Framsóknarflokksins og fyrrverandi forsætisráðherra segir það skjóta skökku við að Bjarni Benediktsson forsætisráðherra sé hissa hversu mikið af skattfé bresks almennings var lánað bönkum sem voru illa reknir þegar núverandi ríkisstjórn hafi viljað gefa gjaldþrota banka peninga skattgreiðenda. Haft var eftir Bjarna í viðtali á Sky að þar sem alþjóðlegar fjármálakrísur hafi orsakað efnahagslegan samdrátt oftar en einu sinni í sögunni þá gangi hann út frá því að það muni endurtaka sig, sagði hann einnig að það að fangelsa bankamenn hefði grætt sár þjóðarinnar og að það hafi verið of lítið gert annarsstaðar til að rannsaka möguleg sakamál.

„Það kemur mér á óvart hversu mikið af féi skattborgara var notað til að bjarga einkafjárfestingum, sem var gert með því að gefa illa reknum bönkum fé, og það kemur mér einnig á óvart sú staðreynd að lítið var gert í öðrum löndum í að rannsaka og hugsanlega sækja til saka þá sem brutu lögin,“

sagði Bjarni í viðtalinu við Sky. Sigmundur Davíð vekur athygli þá þessum þrem atriðum á Fésbók og segir:

Gott og vel. En hvernig getur hann sagt þetta á sama tíma og íslensk stjórnvöld hafa lagt sig í líma við að þjónusta marga þeirra áhættusæknustu og grófustu í breska fjármálageiranum? Þ.e. vogunarsjóðina sem hafa fengið sérkjör í gjaldeyrisútboðum og svo sérstaka aðstoð, og gæðastimpil forsætis- og fjármálaráðherra, við að eignast Arionbanka.

Í öðru lagi þá skjóti það skökku við að Bjarni sé hissa hversu mikið af skattfé bresks almennings var lánað bönkum sem voru illa reknir þegar leiðtogar ríkisstjórnarinnar hafi viljað gefa gjaldþrota banka peninga skattgreiðenda:

Fjármálaráðherrann stofnaði meira að segja sérstök samtök um það,

segir Sigmundur Davíð. Í þriðja lagi, varðandi hugsanlega bankakreppu, segir Sigmundur:

Ef von er á annarri bankakrísu vegna græðgi fólks hvers vegna var þá ekki haldið áfram með vinnu við að koma á heilbrigðu fjármálakerfi á Íslandi? Þess í stað var vinnan látin niður falla, kosningum flýtt og mynduð ríkisstjórn sem kallar það traustleikamerki að gírugir vogunarsjóðir beiti brögðum til að yfirtaka stærsta banka landsins.