Húsavíkurstofa, sameiginlegur vettvangur ferðaþjónustuaðila á Húsavík, gagnrýnir harðlega að nauðsynlegar samgönguframkvæmdir á landsbyggðinni nái ekki fram að ganga í nýlega samþykktri samgönguáætlun Alþingis. Miðað við boðaðar breytingar á áætluninni er ljóst að Dettifossvegur verður ekki kláraður á árinu 2018 líkt og áður hafði verið stefnt að. Þetta er áfall fyrir ferðaþjónustuuppbyggingu á Norðurlandi og þar með samfélagið í heild sinni.
Uppbygging vegakerfis mikilvæg
Húsavíkurstofa furðar sig á því að stjórnmálamenn umgangist samgönguáætlun með þessum hætti, sem gengur þvert gegn yfirlýsingum þeirra í aðdraganda nýafstaðinna kosninga um nauðsyn þess að setja meira fjármagn í uppbyggingu innviða, ekki síst til vegamála. Fyrir ferðaþjónustu á Íslandi er viðhald og uppbygging vegakerfisins og annarra samgöngumannvirkja einn mikilvægasti þátturinn í því að atvinnugreinin nái að vaxa og dafna öllum landsmönnum til heilla. Áframhaldandi fjársvelti til samgöngumála mun leiða til hruns í samgöngukerfinu innan skamms tíma, sem mun koma hart niður á ferðaþjónustu, öðrum atvinnugreinum og íbúum landsins.
Niðurgrafinn moldarvegur
Dettifossvegur nr. 862 er niðurgrafinn moldarvegur sem getur alls ekki annað þeirri eftirspurn sem nú þegar er til staðar á svæðinu við Dettifoss, aflmesta foss Evrópu og eitt mesta aðdráttarafl fyrir ferðamenn á Norðurlandi.
Húsavíkurstofa skorar á Alþingi að tryggja fulla fjármögnun á lífsnauðsynlegum samgönguframkvæmdum sem efla muni innviði og atvinnutækifæri á landsbyggðinni.
Húsavík, 6. mars 2017
Stjórn Húsavíkurstofu
