Orðið á götunni er að flokkseigendur Sjálfstæðisflokksins og sægreifar kunni Jóni Gunnarssyni, þingmanni flokksins, litlar þakkir eftir að Guðrún Hafsteinsdóttir lagði Áslaugu Örnu Sigurbjörnsdóttur með 19 atkvæða mun í formannskosningu í Sjálfstæðisflokknum í gær. Stefnt hafi í nokkuð öruggan sigur Áslaugar Örnu fyrir helgi en á fimmtudagskvöldið tók Jón upp á því að birta færslu á facebook þar sem hann hélt því fram að Guðrún Hafsteinsdóttir hefði skreytt sig með stolnum fjöðrum er hún benti á það í viðtalsþætti að lítið hefði gerst í útlendingamálum fyrr en hún varð dómsmálaráðherra. Vitnaði hún sérstaklega til þeirra breytinga á útlendingalögum sem hún náði í gegn síðasta vor.
Jón kvartar sáran undan þessu og segir forvera Guðrúnar í ráðuneytinu (Áslaug Arna Sigurbjörnsdóttir og Jón sjálfur) hafa lagt grunn að þessum breytingum. Orðið á götunni er að vissulega hafi bæði Áslaug Arna og Jón reynt að gera mikilvægar breytingar á lögunum en ekkert hafi hins vegar gerst í þeim efnum fyrr en Guðrún kom í ráðuneytið.
Jón sakaði Guðrúnu um að svara ekki skilaboðum frá sér og sagðist því nauðbeygður til að birta færsluna á facebook. Orðið á götunni er að óhægt hafi verið um vik fyrir Guðrúnu að svara skilaboðum Jóns þar sem hann hafi sent þau á „like“ síðu hennar sem stjórnmálamanns en ekki hennar persónulegu síðu. Því sé með öllu óvíst að henni hafi nokkurn tíma verið kunnugt um þau.
Orðið á götunni er að facebook-færsla Jóns á fimmtudagskvöldið hafi verið lágkúruleg og rætin árás á Guðrúnu Hafsteinsdóttur og ætluð til þess að skaða möguleika hennar í formannkjörinu. Áhrifin hafi hins vegar verið þveröfug. Færslan hafi orðið til þess að tugir landsfundarfulltrúa ákváðu að ljá Guðrúnu atkvæði sitt en ekki Áslaugu Örnu. Í raun hafi færslan rifjað upp fyrir fólki getuleysið sem einkennt hafi dómsmálaráðherra Sjálfstæðisflokksins þar til Guðrún tók við því embætti
Orðið á götunni er að Guðrún Hafsteinsdóttir geti þakkað facebook-jarmi Jóns Gunnarssonar það að síðustu atkvæðin, sem öllu máli skiptu þegar upp var staðið, náðust í hús. Að sama skapi hugsi flokkseigendur og sægreifarnir, sem studdu Áslaugu Örnu, Jóni þegjandi þörfina.
