Salka Sól Eyfeld söngkona er afar ósátt við Bjarna Benediktsson forsætisráðherra. Hún gagnrýnir hann fyrir litla lestrarkunnáttu í ljósi gagnrýni hans á frumvarp til breytinga á meðal annars lögum um mannanöfn og fyrir að sýna stöðu foreldra og barna, sem þurfa að glíma við afleiðingar yfirstandandi verkfalla kennara í sumum leikskólum, grunnskólum og framhaldsskólum, engan áhuga.

Eins og DV greindi frá fyrr í dag hefur gætt þess misskilnings að frumvarp nokkurra stjórnarandstöðuþingmanna snúist um að taka fyrir að hægt sé að nota orðið afi. Frumvarpið snýr að breytingu á ýmsum lögum til að bæta stöðu trans fólks, meðal annars á lögum um mannannöfn. Í frumvarpinu stendur meðal annars, þegar kemur að breytingu á þeim lögum:

„Í stað orðanna „afa síns“ í 4. málsl. 2. mgr. kemur: stórforeldris síns.“

Sá hluti laganna hljóðar svo nú:

„Heimilt er að ófeðrað barn sé kennt til afa síns.“

Eitthvað hefur borið á umræðu á samfélagsmiðlum um að það eigi með þessu að banna orðið afi en viðkomandi virðast ekki hafa fyrir því að lesa sér til um að þetta ákvæði snýst um að heimilt sé að kenna ófeðrað barn ekki eingöngu við afa sinn.

Biður fólk að anda rólega – Það sé enginn að banna ömmur og afa

Sú útgáfa frumvarpsins sem gagnrýnd hefur verið á samfélagsmiðlum er hins vegar frá síðasta vetri en þá hljómaði greinina umrædda svona:

„Í stað orðanna „afa síns“ í 4. málsl. 2. mgr. kemur: foreldris foreldris síns.“

Ekkert að leiðrétta

Eins og minnst var á í frétt DV fyrr í dag þá var forsætisráðherra ekkert að leiðrétta þennan misskilning að frumvarpið snerist um að banna orðið afi í færslu á X. Hann deildi skjáskoti af fyrstu síðu frumvarpsins og skrifaði í færslunni:

„Í dag er pabba og afadagur í leikskólanum. Ég mæti í kaffi sem stoltur afi. Það er ótrúlegt en satt að nokkrir þingmenn vildu breyta kenninöfnum í mannanafnalögum. Ég væri ekki lengur afi heldur foreldri foreldris. Vitleysan ríður ekki við einteyming.“

Salka Sól Eyfeld gagnrýnir færslu Bjarna harðlega og segir augljóst að lesskilningi hans sé ábótavant og að honum sé bersýnilega sama um foreldra eins og hana sem eigi börn á leikskólum þar sem kennarar séu í verkfalli:

„Þessir drengir sem geta ekki lesið sér til gagns..hann fékk þó að fara í leikskólann, mín börn eru að fara inní vikur þrjú í verkfalli og honum er bara drull.“

Þessir drengir sem geta ekki lesið sér til gagns..hann fékk þó að fara í leikskólann, mín börn eru að fara inní vikur þrjú í verkfalli og honum er bara drull https://t.co/eG8W8fufgp

— Salka Sól Eyfeld (@salkadelasol) November 12, 2024