Óhætt er að segja að sonur ítalsks manns, sem stundaði viðskipti með sorp, hafi dottið í lukkupottinn. Hann erfði málverk eftir foreldra sína og síðar kom svo í ljós að málverkið er eftir Pablo Picasso og því mjög verðmætt.

Andrea Lo Rosso getur því orðið nánast milljarðamæringur á íslenskan mælikvarða ef hann selur málverkið. BBC skýrir frá þessu.

Faðir hans fann málverkið fyrir 60 árum í yfirgefnu húsi. Hann spáði ekki neitt sérstaklega í því en tók málverkið til handargagns og gaf konunni sinni.

Hún var ekkert sérstaklega hrifin af því en hengdi það samt upp heima hjá þeim og síðar á veitingastað fjölskyldunnar.

En þau veittu því ekki neina athygli að í efra vinstra horninu stóð „Picasso“.

Lo Rosso hefur barist fyrir því árum saman að fá staðfest að málverkið sé eftir Picasso og það tókst að lokum. Er það metið á sem svarar til um 900 milljóna íslenskra króna.