Lilly sló fyrst í gegn í þáttunum Lost sem sýndir voru á árunum 2004 til 2010 og kom hennar síðasta hlutverk í myndinni Ant-Man and the Wasp: Quantumania sem frumsýnd var í fyrra. Tökum á myndinni lauk fyrir þremur árum og hefur Lilly ekki tekið að sér neitt verkefni síðan þá.
Leikkonan, sem er orðin 44 ára, segir að hún hafi sett leiklistarferilinn á hilluna – í bili að minnsta kosti – og hún gæti ekki verið hamingjusamari.
Lilly birti myndband á Instagram-síðu sinni sem var tekið árið 2006 en í myndbandinu sagði hún meðal annars: „Ég er hrædd við að viðurkenna þetta fyrir leiklistarheiminum en eftir tíu ár væri ég til í að vera hætt að leika og búin að eignast fjölskyldu. Ég væri til í að skrifa og sinna mannúðarstörfum.“
Það er skemmst frá því að segja að síðan myndbandið var tekið fyrir 18 árum hefur Lilly eignast tvö börn, skrifað nokkrar barnabækur og sinnt mannúðarstörfum í löndum eins og Rúanda.
Lilly segist ekki geta verið hamingjusamari þessa dagana. „Það getur verið að ég snúi aftur til Hollywood einhvern daginn, en, eins og sakir standa, er þetta þar sem ég á heima.“
