Í aðsendri grein á Vísi í morgun gerir Katrín Sigríður J. Steingrímsdóttir varaþingmaður Viðreisnar nánari grein fyrir frumvarpi um dánaraðstoð sem hún hefur lagt fram á Alþingi. Hún segir að frelsið eigi að ráða för og þess vegna eigi sjúklingar að eiga rétt á að deyja á eigin forsendum.

Hún segir það augljóslega ekki virka að banna það sem sé hættulegt og leyfa það sem er öruggt:

„En ef bannstefnan virkar, hvers vegna deyja þá margir tugir einstaklinga á ári, fyrir aldur fram, vegna vímuefnaneyslu? Þvert á móti hef ég hitt marga notendur vímuefna sem óttast að leita sér aðstoðar einmitt vegna þess að neysla er bönnuð. Bannstefnan veldur meiri skaða en bótum.“

Fólk verði að fá að taka ábyrgð á sjálfu sér

Hún segir frelsi undirstöðu samfélagsins. Það sé skaðaminnkandi og einfaldi líf fólks. Alþingismenn verði að treysta fólki til að taka ákvarðanir um eigið líf og bera ábyrgð á því.

Þingmenn verði að þora að halda frelsinu á lofti. Þess vegna hafi hún lagt frumvarpið fram. Dánaraðstoð sé bæði frelsis- og mannúðarmál. Katrín lýsir meginatriðum frumvarpsins þannig:

„Í frumvarpinu er lagt til að sjúklingur sem óskar eftir dánaraðstoð skal vera lögráða og sjálfráða, þannig á sig kominn andlega að vera fær um að taka ákvörðun um að óska dánaraðstoðar, með ólæknandi sjúkdóm og upplifir ómeðhöndlanlega og óbærilega þjáningu.“

Hún segir að enginn læknir verði neyddur til að taka þátt í dánaraðstoð stríði það gegn hans sannfæringu. Heilbrigðisstarfsfólk sé hins vegar orðið mun jákvæðara en áður í garð dánaraðstoðar. Í skýrslu heilbrigðisráðuneytisins frá því í fyrra komi fram að meirihluti lækna og mikill meirihluti hjúkrunarfræðinga og sjúkraliða sé hlynntur því að dánaraðstoð verði leyfð á Íslandi.

Katrín ítrekar að lokum mikilvægi málsins:

„Það er mikilvægt að við fáum að lokum að kveðja á eigin forsendum og því tel ég nauðsynlegt að frumvarpið fái fram að ganga.“

Grein Katrínar er hægt að lesa í heild sinni hér.