Orri Þórisson, þjálfari KV í þriðju deild karla í knattspyrnu á Íslandi kemst í heimsfréttirnar en það er staðreyndin að hann hafi spilað sama tölvuleikinn í tæpa 14 þúsund klukkutíma er ástæða þess.

Orri er 27 ára gamall en hann hefur spilað Football Manager leikinn í 13,700 klukkustundir sem eru um 8 prósent af öllum þeim tíma sem Orri hefur verið vakandi á sinni lífsleið.

Orri var ráðinn þjálfari KV í vetur. „Mitt markmið er að koma liðinu upp og gera fjölskyldu mína stolta,“ segir Orri í samtali við SportBible sem er vinsæll fjölmiðill í Englandi.

Orri hefur ekki mikla reynslu af þjálfun en var þó áður með KRÍU í neðstu deild hér á landi. Hann hefur hins vegar mikla reynslu úr Football Manager sem er leikur sem gengur út á það að vera þjálfari liðsins..

„Ég vil hjálpa leikmönnum að fá meira sjálfstraust og gleði úr okkar fallega leik.“

Orri telur að tölvuleikurinn hafi gert hann að betri þjálfara. „Ég trúi því að leikurinn hafi haft jákvæð áhrif á líf mitt sem þjálfari í raunveruleikanum,“ segir Orri.

„Að taka ákvarðanir undir pressu og setja upp plan og leysa vandamálin.“

„Leikurinn hefur hjálpað mér og sérstaklega i gegnum erfið tímabil í mínu lífi. Ég finn frið þegar ég spila leikinn og hugurinn fer þá frá því sem getur verið erfitt í lífinu.“