Karlmaður á fertugsaldri hefur verið ákærður fyrir hrottalegar líkamsárásir gegn tveimur konum auk umferðarlagabrota. Brotin áttu sér stað í Reykjavík en maðurinn er nú skráður til heimilis í Póllandi og hefur ekki tekist að birta honum ákæruna. Var hún því birt í Lögbirtingablaðinu í morgun.

Hótaði að raka hárið af konu

Ákæru liðirnir eru sjö talsins en fyrsta brotið átti sér stað þann 30. desember 2021 en þá veittist maðurinn með ofbeldi gegn konu á sama aldri. Reif hann í hár hennar, dró hana niður steyptar tröppur, sparkaði í hana, sló hana nokkrum sinnum og tók hana hálstaki. Afleiðingar voru þær að konan  hlaut marbletti í andliti, hægri framhandlegg, vinstra hné, vinstri mjöðm og vinstri rist auk þess sem hún var bólgin og aum í nefbeini og hægri hluta kjálka.

Þá hótaði maðurinn að taka rakvél og raka hárið af konunni.

Fékk brunasár eftir brennisteinssýru

Þann 12. apríl 2022 réðst maðurinn aftur að sömu konu á sama stað sem og vinkonu hennar. Reif hann í bol fyrrnefndu konunnar þannig að hún skall með höfuðið í glugga, greip í báða framhandleggi hennar og klóraði hægri framhandlegg hennar með nögl sinni. Hlaut sú kúlu og mar á enni og skrámu á hægri framhandlegg.

Vinkonan fékk hrottalegri meðferð en í ákæru kemur fram að maðurinn hafi gripið um handleggi hennar klæddur brennisteinssýrusmituðum vettlingum, með þeim afleiðingum að vinkonan hlaut fyrsta og annars stigs brunasár á báðum handleggjum.

Þá hótaði hann konunum báðum lífláti og taldi niður sekúndurnar uns þær myndu deyja sem vakti hjá þeim verulegan ótta.

Að auki er maðurinn ákærður fyrir þrjú umferðalagabrot en á nokkra vikna tímabili var hann þrisvar stöðvaður við akstur án þess að hafa réttindi til að stýra ökutæki.