Geir Þorsteinsson, fyrrum formaður KSÍ segir það algjöra steypu að ætla sér að setja gervigras á Laugardalsvöll. Slíkt er til umræðu þegar forystu KSÍ er orðið ljóst að ekki verður byggður nýr völlur á næstu árum.

Grasið á Laugardalsvelli er komið til ára sinna og ekkert hitakerfi er undir vellinum til að hjálpa til þegar illa viðrar.

„Það er ástæða til að hrósa vallarstarfsmönnum í Laugardal fyrir góðar aðstæður í kvöld á landsleik Íslands og Þýskalands,“ skrifar Geir á Facebook síðu sína í gær eftir að kvennalandsleiknum lauk.

Hann segir ljóst að breyta þurfi undirlagi vallarins en vill ekki sjá gervigras. „Hybrid gras með undirhita, vökvakerfi og yfirbreiðslu mun gera völlinn enn betri. Allt tal um gervigras er galið, það er ekki notað nema þar sem eru engin önnur úrræði á efstu stigum fótboltans og þá er sama hvar er í heiminu. Ítreka, gervigras er varalausn fyrir fótbolta svo hægt sé að sparka bolta hvar sem er. Þess þarf ekki í Reykjavík í landsleikjum og ummæli þeirra sem taka þátt í leiknum á efstu stigum bera þess glöggt vitni að gervigras er ekki hátt skrifað.“

Að endingu skrifar Geir um mætinguna á landsleikinn í gær og telur hann að KSÍ geti gert betur til að fá fleiri á völlinn. „Ekki ætla ég að fara mörgum orðum um leikinn en hegg í sama knérunn þegar ég legg til að á svona leiki, þar sem ljóst var að fáir kæmu á völlinn, yrði auglýst frítt fyrir börn í fylgd foreldra í austurstúkuna (og yngri flokkar sérstaklega hvattir til að mæta). Stelpurnar þurfa stuðning og sú aðferð skilar væntanlega stuðningi og stemmningu. Gætum lært að Þjóðverjum í þessu hvað varðar kvennaleiki. (Bara svo það komi fram setti ég þessa skoðun fram í september í sömu keppni á Xinu). Áfram Ísland!.“