Ásdís Kristjánsdóttir, bæjarstjóri Kópavogs, segir að meirihlutinn í Kópavogi hafi staðið vörð um hagsmuni bæjarins varðandi lóðarúthlutun á Kársnesi sem fjallað var um fyrr í dag. Þá steig Sigurbjörg Erla Egilsdóttir, bæjarfulltrúi Pírata, fram og sakaði Ásdísi og meirihlutann um að hafa fært einum ríkustu systkinum landsins lúxus-lóðir á silfurfati án útboðs. Um er að ræða lóð á Kársnesi, svo kallaðan Reit 13 þar sem gert er ráð fyrir 150 íbúðum, sem Mata-systkinin, Eggert Árni, Guðný Edda, Gunnar Þór og Halldór Páll Gíslabörn, fengu úthlutað í gegnum félag sitt Fjallasól ehf. án auglýsingar.
Sigurbjörg Erla gagnrýndi gjörninginn harðlega og sagði úthlutunina brot á jafnræði og þá væri afar slæmt að ekki væri tryggt að hluti íbúðanna sem yrðu byggðar á reitnum yrðu fyrir tekjulægri hópa. „Þetta verða dýrar íbúðir fyrir ríkt fólk,“ sagði Sigurbjörg Erla.
Ásdís hefur nú brugðist við gagnrýni og segir að málið hafi verið vandlega unnið, farið yfir allar forsendur og tryggt hafi verið að marksverð fékkst fyrir lóðina.
„Úthlutun á ákveðnum lóðum við Reit 13 á Kársnesi til Fjallsólar ehf. án auglýsingar var nauðsynlegt vegna skörunar bæjarlands og fasteigna í eigu félagsins, og tryggja þannig heildstæða uppbyggingu á reitnum,“ segir Ásdís í færslu á Facebook-síðu sinni.
Segir hún að öðrum lóðum bæjarins, meðal annars á umræddu svæði, verði úthlutað í gegnum auglýsingar sem sé meginregla hjá Kópavogbæ
„Þá gengur sú afstaða minnihlutans að skipulagið færi í auglýsingu áður en samkomulagið var undirritað gegn hagsmunum bæjarbúa. Ef sú leið hefði verið farin hefði staða bæjarins verið veikari fyrir vikið. Nauðsynlegt var að ganga frá samkomulagi við lóðarhafa um byggingarréttargjald áður en deiliskipulagið færi í auglýsingu þannig að tryggt væri að lóðarhafar taki þátt í kostnaði á innviðauppbyggingu á svæðinu. Hér er því einfaldlega verið að standa vörð um hagsmuni bæjarbúa!,“ segir Ásdís.
