Þann sjöunda júní næstkomandi verður aðalmeðferð fyrir Héraðsdómi Reykjaness í máli sem Héraðssaksóknari hefur höfðað á hendur manni fyrir gróf kynferðisbrot og stórfelld brot í nánu sambandi. Þinghaldið verður lokað enda málið viðkvæmt.

Meint brot áttu sér stað árið 2020 og beindust gegn þáverandi eiginkonu mannsins. Ákæran er í þremur liðum og er fyrsta brotið sagt hafa átt sér stað á heimili hjónanna þann 13. maí 2020. Er maðurinnn þá sagður hafa nauðgað konunni bæði í leggöng og endaþarm og notfært sér að hún gat ekki spornað við verknaðinum vegna svefndrunga og ölvunar. Ennfremur segir í ákæru að konan hafi hlotið smáfleiður á innanverðum skapabörmum, punktablæðingar í slímhúð neðan við þvagrásarop og gyllinæðagúl við endaþarm.

Annað meint brot átti sér stað í sumarbústað í nóvember árið 2020. Maðurinn er þar sagður hafa beitt konuna aflsmun og ítrekað haft þannig samfarir við hana gegn vilja hennar. Tilraunir konunnar til að komast undan ofbeldi mannsins báru engan árangur og hljóp hún meðal annars undan honum inn í eldhús en hann elti hana, hélt á henni aftur inn í svefnherbergi og hélt áfram að brjóta á henni.

Í þriðja lagi er maðurinn sakaður um stórfelld brot í nánu sambandi með því að hafa framið þessi tvö fyrrgreindu kynferðisbrot og „þannig ítrekað, alvarlega og á sérstaklega meiðandi hátt brotið alvarlega gegn þáverandi eiginkonu sinni og skapað viðvarandi ógnarástand í sambandi þeirra sem olli A andlegum þjáningum, kúgun og vanmætti sem hún upplifði við þessar aðstæður sem ógnuðu heilsu og velferð hennar,“ eins og segir orðrétt í ákæru.

Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar. Konan krefst þess að maðurinn greiði henni 5,5 milljónir króna í miskabætur vegna ofbeldisins.