Héraðsdómur Reykjavíkur hefur vísað frá hryðjuverkahluta ákæru gegn þeim Sindra Snæ Birgissyni og Ísidór Nathanssyni. Eru þeir félagar ákærðir fyrir vopnalagabrot en ekki áform um hryðjuverk.

Héraðssaksóknari hefur tekið sér frest til að íhuga hvort hann áfrýjar þessum úrskurði til Landsréttar. Ef hann gerir það ekki er ljóst að tvímenningarnir, sem sátu mánuðum saman í gæsluvarðhaldi og einangrun vegna rannsóknarinnar, eru lausir allra mála hvað varðar ásakanir um áform um hryðjuverk.

Sveinn Andri Sveinsson, verjandi Sindra Snæs, segir að málið sé mikilvægur lærdómur fyrir lögregluna og ákæruvaldið:

„Komi svona mál upp aftur er mikilvægt að rasa ekki um ráð fram heldur fylgjast vel með grunuðum einstaklingum og ekki rjúka í að halda blaðamannafundi fyrr en búið er að ná utan um mál,“ segir verjandinn.

Grunur um hryðjuverkaáform Sindra Snæs og Ísidórs voru byggð á samtölum þeirra um hryðjuverk á spjallforriti. Í ákæru héraðssaksóknara voru hryðjuverkaáform ótilgreind varðandi væntanlegan vettvang og tímasetningar, sem og hverjir hefðu átt að verða fyrir hryðjuverkunum.

Í úrskurðinum segir meðal annars að engar röksemdir séu í ákæru sem málssóknin sé byggð á. „Liggur þó fyrir að málið er umfangsmikið og án fordæma. Miðað við atvik þess og eðli hinna meintu brota verður að gera ríkar kröfur um skýrleika téðra ákærukafla.“ Segir í úrskurðinum að mikið vanti upp á slíkan skýrleika.