Efling hefur ákveðið að láta Héraðsdóm skera úr um lögmæti miðlunartillögu sáttasemjara. Þetta kemur fram í fréttatilkynningu sem var send rétt í þessu.

„Vegna viðbragðsleysis Guðmundar Inga Guðbrandssonar félags- og vinnumarkaðsráðherra við stjórnsýslukæru sem Efling – stéttarfélag lagði fram við ráðherrann þann 30. janúar hefur félagið ákveðið að skjóta kröfu um ógildingu miðlunartillögu til almennra dómstóla.“

Efling segir að þar með verði ríkissáttasemjara stefnt fyrir Héraðsdóm þar sem Efling muni krefjast ógildingar á miðlunartillögu embættisins sem kynnt var þann 26. janúar.

„Efling hefur frá upphafi hafnað lögmæti tillögunnar, sem lögð var fram þvert á ákvæði laga um að ráðgast bera við deiluaðila og er auk þess í einu og öllu samhljóða kröfum Samtaka atvinnulífsins. Öll heildarsamtök launafólks á Íslandi hafa gagnrýnt meðhöndlun ríkissáttasemjara á málinu.“

Stefnan verður lögð fyrir Héraðsdóm Reykjavíkur í dag og óskað verður eftir flýtimeðferð.

„Við höfum sagt frá byrjun að miðlunartillaga ríkissáttasemjara er lögleysa og markleysa. Embættið hefur misnotað valdheimildir sínar til að taka afstöðu með sjónarmiðum annars aðilans í kjaradeilu og reyni að svipta hinn aðilann, sem í þessu tilviki er tekjulægsta verkafólk landsins, sjálfstæðum samningsrétti sínum. Við eigum heimtingu á að dómstólar fjalli um þetta framferði,“ er haft eftir Sólveigu Önnu Jónsdóttir, formanni Eflingar, í tilkynningu.