Sölvi Snær Guðbjargarson hefur ákveðið að leggja skóna á hilluna í bili en þetta kemur fram í tilkynningu Breiðabliks í kvöld.

Um er að ræða leikmann sem er fæddur árið 2001 en hann hefur verið töluvert meiddur undanfarna mánuði.

Sölvi lék áður með Stjörnunni en hann gekk í raðir Breiðabliks fyrir um tveimur árum síðan.

Tilkynning Breiðabliks:

Sölvi Snær Guðbjargarson hefur ákveðið að taka sér frí frá knattspyrnu næstu misserin og hefur knattspyrnudeild Breiðabliks orðið við þeirri ósk.

Sölvi Snær kom til Breiðabliks frá Stjörnunni í maí 2021 og er með samning við Breiðablik til október 2024.

Sölvi sem er fæddur árið 2001 hefur leikið 21 leik í deild og bikar fyrir Breiðablik og skorað í þeim 3 mörk, auk þess að hafa tekið þátt í 3 Evrópuleikjum fyrir félagið.

Um ákvörðun Sölva hafði Ólafur Kristjánsson, yfirmaður knattspyrnumála hjá Breiðabliki þetta að segja:„Sölvi kom að máli við okkur Óskar Hrafn í upphafi vikunnar og tjáði okkur að hann óskaði eftir að taka sér hvíld frá knattspyrnu, þar sem að hann teldi sig ekki geta gefið 100% af sér til verkefnisins. Þaðan fór erindið inn á mitt borð og höfum við Sölvi rætt málið og niðurstaðan er þessi. Sölvi fær leyfi frá æfingum og keppni hjá félaginu á meðan þetta er staðan, en honum er velkomið að byrja aftur hjá okkur ef staða mála breytist, enda Sölvi hæfileikaríkur leikmaður og einstaklega góður drengur sem er vel liðinn af öllum í félaginu. Sölvi hefur verið óheppinn með meiðsli síðan hann kom í Breiðablik og hefur ekki alveg náð samfellu í æfingum og keppni. Hefur það eflaust haft áhrif á ákvörðun hans.“

Sölvi Snær hafði þetta um ákvörðun sína að segja: “Ég er búinn að vera að glíma við endurtekin meiðsli í langan tíma og hefur fundist erfitt að gíra mig upp og gefa mig 100% vitandi að líkaminn væri ekki í standi til þess. Mér hefur liðið mjög vel í Breiðabliki og fannst heiðarlegast gagnvart þjálfurunum, liðsfélögunum og félaginu að koma hreint fram og óska eftir að fá hvíld. Hvað tekur við, veit ég ekki en ég ætla að byrja á því að reyna að ná mér meiðslalausum og sjá hvort að neistinn komi aftur. Hvort ég muni snúa aftur á þessu ári eða seinna verður tíminn að leiða í ljós.
Ég er þakklátur félaginu fyrir að hafa mætt ósk minni af skilningi og fundið lausn á þessarri óvenjulegu beiðni minni.“

Breiðablik þakkar Sölva í bili og óskar honum velfarnaðar, vonandi sjáum við hann aftur á vellinum. 💚