Framherjinn knái, Katrín Ásbjörnsdóttir hefur ákveðið að nýta sér uppsagnarákvæði í samningi sínum við Stjörnuna. Þetta herma öruggar heimildir 433.is.
Katrín var ein af bestu leikmönnum Bestu deildar kvenna í sumar þegar Stjarnan náði nokkuð óvænt öðru sæti deildarinnar.
Katrín skoraði níu mörk í fimmtán leikjum en framherjinn fagnaði á þessu ári þrítugs afmæli sínu.
Óvíst er hvort Katrín endursemji við Stjörnuna eða skoði aðra kosti en líklegt er að önnur lið hafi mikinn áhuga á að semja við hana.
Katrín lék sína fyrstu leiki í meistaraflokki árið 2008 með uppeldisfélagi sínu KR en einnig hefur hún spilað með Þór/KA og Stjörnunni.
Hún hefur á ferli sínum spilað 19 A-landsleiki og skorað í þeim leikjum eitt mark.
