Akstur ökumanns var stöðvaður klukkan 02.06. Hann er 35 ára. Í farþegasætinu var 12 ára stúlka sem tilkynnt hafði verið að væri týnd. Af þeim sökum voru þau bæði færð á næstu lögreglustöð. Þar skýrði stúlkan frá sambandi þeirra og að þau hefðu stundað kynlíf með hennar samþykki. Í kjölfarið var maðurinn handtekinn.
Í gær komst undirréttur í Helsingør að þeirri niðurstöðu að um nauðgun hefði verið að ræða þegar þau stunduðu kynlíf og skipti þá engu að stúlkan hafði samþykkt það. Dómurinn var kveðinn upp á grunni laga sem tóku gildi 1. mars síðastliðinn en þau kveða á um að ef fullorðinn einstaklingur og barn yngra en 15 ára stundi kynlíf þá sé það nauðgun og skipti engu þótt barnið hafi samþykkt kynlífið.
Málið er fyrsta sinnar tegundar sem dæmt er í eftir að lögin tóku gildi.
Jótlandspósturinn segir að maðurinn hafi ekki sýnt nein svipbrigði þegar dómurinn var kveðinn upp.
Hann komst í samband við stúlkuna í gegnum samfélagsmiðla. Þau höfðu tvisvar sinnum samfarir á heimili hans í Hørsholm þann 28. apríl með samþykki stúlkunnar.
En samkvæmt nýju lögunum þá getur barn, yngra en 15 ára, ekki gefið samþykki sitt fyrir að stunda kynlíf með einstaklingi eldri en 22 ára. Af þeim sökum var maðurinn ákærður fyrir nauðgun.
Til stóð að kveða upp úr um refsingu mannsins í gær en því var frestað til 28. september þar sem niðurstaða geðrannsóknar liggur ekki fyrir.
