Allir hafa sína eigin rútínu þegar kemur að því að fara í bað eða sturtu. Sumir geta ekki byrjað daginn nema þeir fari fyrst í sturtu en aðrir láta nægja að skola af sér á þriggja til fjögurra daga fresti.
En það eru til réttar og rangar aðferðir þegar kemur að því að fara í bað eða sturtu. Heilbrigðissérfræðingar segja að það sé betra að þvo líkamann of sjaldan en of oft. Þeir segja einnig að ekki eigi að eyða of miklum tíma í baði eða sturtu. CBS New York skýrði frá þessu fyrir nokkrum árum.
Miðillinn hefur eftir Shirley Madhere, lækni, að húð okkar sé þakin góðum bakteríum sem vernda okkur. Ef við stöndum of lengi eða of oft undir heitri vatnsbunu, eða liggjum í heitu vatni, eigum við á hættu að drepa þær að hennar sögn. „Þessar bakteríur og örverur, einnig veirur og sveppir, hjálpa líkama okkar að virka eins og hann gerir,“ er haft eftir henni.
„Ef maður fer of oft í bað eða er of lengi í baði fjarlægir maður þessar góðu bakteríur og það getur haft í för með sér að maður kvefist eða veikist auðveldar,“ sagði hún einnig.
Sérfræðingar ráðleggja fólki að vera ekki lengur en 15 mínútur í sturtu eða baði og þess utan mæla þeir með því að hitinn á vatninu sé lækkaður. Paula Simpson, næringarfræðingur, sagði að ef vatnið sé of heitt og baðferðin taki of langan tíma geti það valdið húðsýkingu og exemi.
