Stjórstjarnan Sandra Bullock hefur gefið í skyn að hún ætli sér að taka langt hlé frá kvikmyndaleik og framleiðslu kvikmynda. Þetta sagði Bullock á blaðamannafundi við frumsýningu nýrrar myndar, The Lost City, í Austin Texas. Bullock er aðalframleiðandi myndarinnar auk þess að fara með aðalhlutverk ástarsagnahöfundarins Loretta Sage.

Aðspurð hvert væri næsta skref sagði Bullock, sem er 57 ára gömul: „Ég ætla að veita sjálfri mér smá svigrúm til að vera móðir.“ Bullock ættleiddi soninn Louis árið 2010 og dótturina Lailu árið 2015. Aðspurð hvenær hún sæi fyrir sér að taka að sér næstu verkefni sagði hún að mögulega yrði það ekki fyrr en börnin hennar væru orðin 16-17 ára gömul.

Hún hefur áður opnað sig um að það sé meira en að segja það að ala upp tvö börn einsömul. „Komdu í heimsókn til okkar og þú sérð brot af hverju einasta uppeldisvandamáli sem til er,“ lét hún hafa eftir sér í hlaðvarpsþætti Jada Pinkett Smith.