Segja má að Mark Zuckerberg og fyrirtæki hans Meta, sem er móðurfyrirtæki samfélags- og samskiptamiðlanna Facebook, Instagram og WhatsApp, séu fallin í verulega ónáð í Rússlandi.

Rússar hafa nú greint frá því að þar í landi sé búið að leggja fram kæru á hendur fyrirtækinu og hafa farið fram á viðurkenningu á því að fyrirtækið sé „öfgasamtök“. Þetta gerist í kjölfar þess að Meta breytti reglum sínum varðandi hatursorðræðu til að heimila hvatningu til ofbeldis gegn Rússum í samhengi við innrásina í Úkraínu. Þessi rýmri heimild á þá aðeins við um notendur fyrirtækisins í tilteknum löndum, svo sem í Úkraínu, Póllandi, Eistlandi, Rússlandi, Slóvakíu og fleirum. Gildir þessi heimild um tjáningu á borð við „Rússneskir innrásarmenn, deyið!“ eins gildir þessi breyting ekki um hvatningu til ofbeldis gegn óbreyttum borgurum Rússlands.

Saksóknari í Rússlandi sagði í dag: „Í samræmi við lög um „aðgerðir gegn aðgerðum öfgahópa“ hefur ákæruvaldið í Rússlandi sent kröfu til dómstóla um að Meta verði viðurkennt sem öfgasamtök og að starfsemi fyrirtækisins verði bönnuð í Rússlandi“

Þó mun WhatsApp ekki verða fyrir áhrifum af þessu banni þar sem yfirvöld í Rússlandi líta á það forrit sem samskiptaforrit en ekki vettvang til opinberra skoðanaskipta.

Áður hafði Rússland lokað á Facebook í landinu, en Instagram og WhatsApp eru þó mun vinsælli í Rússlandi, sérstaklega meðal unga fólksins.