Nýjasta kvikmyndin um Köngulóarmanninn  var frumsýnd föstudaginn hér á landi 17. desember síðastliðinn. Þrátt fyrir samkomutakmarkanir var aðsókn helgarinnar gríðarleg en yfir 18.100 manns skelltu sér á myndina í bíó. Samkvæmt tilkynningu frá Senu þénaði myndin því um 30 milljónir króna sem þýðir að um tekjuhæstu opnunarhelgi allra tíma er að ræða sem og þriðju aðsóknarmestu opnunarhelgi frá upphafi mælinga.

Myndin var sýnd í öllum kvikmyndahúsum landsins og var sýnd í mörgum sölum samtímis þar sem einungis 100 manns mega koma saman í hvert hólf. Vert er að taka fram að kvikmyndahús landsins fylgja ströngum sóttvarnarreglum og tryggja að öryggi og heilsu bíógesta og starfsmanna sé gætt. Ekkert hlé er á sýningum, grímuskylda, engin áfengissala, sjálfvirk sætaskipun og góð loftræsting tryggir að hægt sé að framfylgja sóttvörnum.

Myndin hefur fengið frábæra dóma og mikið lof gagnrýnanda sem og áhorfanda og er til að mynda „certified fresh“ á Rotten Tomatoes.