Líklega veit maður ekki af því þegar maður er dáinn, þá hlýtur öllu eiginlega að vera lokið. En það er kannski erfitt að segja til um það með vissu því við höfum ekki áreiðanlegar upplýsingar um hvort eitthvað taki við eftir dauðann. En Solvor Irene Lindseth, sem býr í Noregi, fékk smá smjörþef af „andláti“ sínu nýlega en hún var bara alls ekki meðvituð um að hún væri dáin.

Hún lenti skyndilega í því að mörg af greiðsluöppunum í síma hennar virkuðu ekki lengur og hún gat til dæmis ekki keypt sér lottómiða. Hún var mjög undrandi á þessu því hún vissi að hún átti nóg af peningum á reikningnum sínum til að borga fyrir lottómiðann. Hún ákvað því að kanna málið betur.

En hún átti enga von á svarinu sem hún fékk. Það var nefnilega búið að skrá hana látna hjá norsku þjóðskránni. VG skýrir frá þessu.

„Ég var skráð látin á fimmtudegi og á lífi á föstudegi. Svo ég var „dáin“ í 24 klukkustundir,“ sagði hún í samtali við VG.

Það var Sankt Olavs sjúkrahúsið í Þrándheimi sem hafði skráð Solvor látna þrátt fyrir að þessi 65 ára kona væri sprelllifandi. Eftir að VG hafði sett sig í samband við sjúkrahúsið höfðu forsvarsmenn þess samband við Solvor og báðust afsökunar á þessum mistökum.

Hún hafði legið á sjúkrahúsinu í eina viku en eins og hún benti á í samtali við VG þá voru veikindin ekki það alvarleg að þau hafi orðið henni að bana.