Lögregluna í New South Wales í Ástralíu grunar að 14 friðaðar kengúrur hafi verið drepnar af ásettu ráði og leitar nú að þeim sem drápu þær. Kengúrurnar fundust dauðar sunnan við Sydney á laugardaginn.

Málið hófst með að lögreglan fann sex kengúrur, fimm fullorðin dýr og einn unga, dauðar nærri Long Beach, sem er um 270 kílómetra sunnan við Sydney, eftir að tilkynnt var um dýrin. Síðar um daginn var tilkynnt um átta dauð dýr, sjö fullorðin og einn unga, í Maloneys Beach sem er ekki fjarri Long Beach.

Í tilkynningu frá lögreglunni kemur fram að margt bendi til að dýrin hafi verið drepin af ásettu ráði.

Sydney Morning Herald segir að lögreglan hafi nú þegar yfirheyrt fjölda vitna. Lögreglumenn eru að fara yfir upptökur úr eftirlitsmyndavélum á svæðinu og almenningur hefur verið beðinn um hjálp. Lögreglan leitar að tveimur hvítum jeppum sem eru sagðir hafa sést á svæðinu skömmu áður en kengúrurnar fundust.

Nær allar tegundir hinna einstöku áströlsku dýra á borð við kengúrur og kóalabirni eru friðaðar í New South Wales vegna líffjölbreytninnar í ríkinu. Þetta þýðir að aðeins má fanga dýrin eða skjóta að fengnu leyfi.