Rúmlega 30.000 breskar konur hafa tilkynnt um truflanir á tíðahring sínum eftir að þær voru bólusettar gegn kórónuveirunni. Þessar truflanir voru þó skammvinnar að sögn Victoria Male, hjá Imperial College London. Hún segir að tíðahringur flestra kvenna komist á rétt ról fljótlega og engar sannanir séu fyrir að bóluefnin hafi áhrif á frjósemi.

Sky News skýrir frá þessu. Male segir að opinber gögn í Bretlandi sýni ekki tengsl á milli breytinga á tíðahring kvenna og bóluefna gegn kórónuveirunni þar sem fáar tilkynningar hafi borist. Í skoðanagrein í British Medical Journal segir hún að breytingar á tíðahring hafi ekki verið tengdar við eitt bóluefni frekar en önnur því tilkynningar hafi borist frá konum sem fengu bóluefni frá Pfizer/BioNTech, Moderna og AstraZeneca.

Hún segir að ef tengsl séu á milli bóluefnanna og truflana á tíðahringnum þá „sé það líklega afleiðing af viðbrögðum ónæmiskerfisins við bólusetningu frekar en við ákveðnum efnum í bóluefninu“. Hún segir einnig að rannsókna sé þörf á þessu til að öðlast skilning á af hverju þetta gerist.

Hún segir einnig í greininni að ekkert hafi komið fram sem styðji sögur um að fólk verði ófrjótt við að láta bólusetja sig.