Nú eru tæplega þrjú ár síðan Anne-Elisabeth Hagen hvarf frá heimili sínu í Lørenskog í Noregi. Síðan þá hefur ekkert til hennar spurst. Lögreglan vinnur enn að rannsókn málsins og telur að eiginmaður Anne-Elisabeth, Tom Hagen, sé viðriðinn hvarf hennar en hann neitar því. Lögreglan telur öruggt að Anne-Elisabeth hafi verið ráðinn bani. Telur lögreglan að lausnargjaldskrafan sem var sett fram í upphafi málsins hafi átt að villa fyrir við rannsókn málsins. Nú hefur vitni í málinu tjáð sig opinberlega um það sem það sá.

Í nýrri heimildarmyndaþáttaröð „Forsvinningen på Lørenskog“ er rætt við konu sem býr nærri heimili Hagen-hjónanna að Sloraveien 4. Frá heimili sínu sér konan yfir göngustíg sem liggur bak við hús Hagen-hjónanna.  TV2 skýrir frá þessu.

Konan segir að sumarið og haustið 2018 hafi hún tekið eftir nokkrum atriðum sem hafi setið í minni hennar síðan. Hún getur ekki tímasett þetta alveg en segir öruggt að þetta hafi verið áður en Anne-Elisabeth hvarf.

„Árla morguns sá ég mann koma gangandi með dýnu eða eitthvað álíka. Hann hitti síðan tvo aðra menn við tré sem stendur við göngustíginn,“ segir konan sem segist hafa verið hissa á þessu og hafi velt fyrir sér hvort einhver hafi sofið þarna utandyra. Þetta sá hún síðan gerast einu sinni til viðbótar.

„Ég veit ekki hvort maðurinn sem bar dýnuna svaf þarna en hann birtist að minnsta kosti þarna snemma morguns í bæði skiptin,“ segir hún.

Lögreglan vildi ekki tjá sig um þetta við TV2 eða önnur atriði er tengjast því hvað gerðist áður en Anne-Elisabeth hvarf.