Sigurður Ragnar Eyjólfsson og Eysteinn Húni Hauksson eru aðalþjálfarar Keflavíkur en liðið er í efstu deild karla og hefur staðið sig með ágætum í sumar. Keflavík er komið aftur í deild þeirra bestu en liðið er fjórum stigum fyrir ofan fallsæti þegar endaspretturinn er að hefjast.
Sigurður Ragnar kom inn í þjálfarateymi Keflavíkur fyrir tæpum tveimmur árum og hefur stýrt liðinu með Eysteini, þegar tveir þjálfarar ráða geta komið árekstrar en það eru líka kostir við það að starfa náið saman. Sigurður Ragnar var gestur í sjónvarpsþætti 433.is á Hringbraut á þriðjudag.
„Það var nýtt fyrir mér að vinna með öðrum, að við séum báðir aðalþjálfarar. Það tók okkur langan tíma að fá það til fúnkera vel, í dag fúnkerar það mjög vel,“ sagði Sigurður Ragnar sem hefur átt langan og farsælan þjálfaraferil, hann hefur meðal annars starfið í Noregi og í Kína.
„Við höfum reynt að nýta styrkleika hvor annars, það tekur oft langan tíma að komast að ákvörðun þegar það eru tveir. Sérstaklega þegar báðir eru þrjóskir eins og við erum, við höfum okkar hugmyndafræði. Stundum þarf maður að gefa eftir, það fær mann til að hugsa um hvað manni finnst mikilvægt. Við reynum að vinna þetta saman, þannig að liðið nái árangri,“ sagði Sigurður.
Í upphafi sumars bárust fréttir af því allt hefði soðið upp úr á milli Sigga og Eysteins. Fjallað var um málið í hlaðvarpsþættinum Dr. Football, Hrafnkell Freyr Ágústsson sérfræðingur þáttarins er búsettur í Reykjanesbæ og kafaði ofan í málið. „Það var pirringur í þjálfarateyminu, Eysteinn og Siggi lentu upp á kant. Það var pirringur í nokkra daga en það var svo leyst,“ sagði Hrafnkell á sínum tíma.
Hrafnkell sagði að Eysteinn hafi ekki mætt til starfa í nokkra daga eftir rifrildi þeirra. „Þetta var 5-10 dögum fyrir mót. Það var bullandi dramatík, ég held að Eysteinn hafi ekki mætt í 4-5 daga á æfingar,“ sagði Hrafnkell.
Í sjónvarpsþætti okkar á þriðjudag staðfesti Sigurður að atvikið hefði átt sér stað. „Ef við værum báðir skaplausir þá hefðum við lítið í þetta að gera, ég get alveg staðfest það að það kom upp atvik í upphafi móts. Það kom upp atvik þar sem við deildum en við náðum að leysa það og liðinu til góðs,“ sagði Sigurður.
Viðtalið er í heild hér að neðan.
