Á þriðjudaginn hófust réttarhöld yfir manninum, sem þýskir fjölmiðlar nefna Stefan R. Hann er ákærður fyrir að hafa myrt bifvélavirkjan með það í huga að borða hann. Kennarinn, sem kennir stærðfræði og efnafræði, kallaði sig „MasterButcher79“ á stefnumótasíðunni.
Mennirnir mæltu sér mót þann 5. september og segja þýskir fjölmiðlar að þetta sama kvöld hafi Stefan R. myrt manninn. Fyrir dómi sagði saksóknari að Stefan R. hafi leitað „að kynferðislegri fullnægingu með því að myrða“ og hafi haft í huga að borða hluta af líki fórnarlambsins.
Morðið framdi hann í íbúð sinni í Berlín. Lögreglan telur að hann hafi síðan hlutað líkið í sundur. Hann losaði sig síðan við nokkra hluta þess á nokkrum stöðum í borginni. Ekki tókst að finna alla líkamshlutana og telur lögreglan að Stefan R. hafi borðað þá en ákæruvaldið telur sig ekki hafa nægilega sterk sönnunargögn fyrir að hann hafi gert það og því er hann ekki ákærður fyrir mannát, aðeins fyrir að hafa haft í hyggju að borða hluta af líkinu. Hann hafði áður skrifað og rætt um mannát á nokkrum spjallsíðum að sögn þýskra fjölmiðla.
