Héraðssaksóknari hefur ákært fyrrverandi starfsmann á skammtímavistun fyrir börn og ungmenni með fötlun í Garðabæ fyrir að hafa tekið mynd af barni þar sem það sat á klósettinu og sent myndina áfram til utanaðkomandi aðila.
Ekki er tilgreint í ákærunni til hvers konan sendi myndina, eða til hve margra. Atvikið mun hafa átt sér stað í febrúar 2019.
„Með athæfi sínu sýndi ákærða af sér vanvirðandi, ruddalega, ósiðlega og móðgandi háttsemi í garð [barnsins], sem þar dvaldi í skammtímavistun ætluð börnum og ungmennum með fötlun,“ segir í ákærunni.
Er konan ákærð fyrir brot á ákvæðum barnaverndarlaga er snúa að vanvirðandi háttsemi gagnvart barni, og að sýna barni yfirgang, ruddalegt eða ósiðlegt athæfi, særa það eða móðga. Varða þessi brot við tveggja og þriggja ára fangelsi. Þá er það sérstaklega tilgreint í ákærunni, að konan hafi verið opinber starfsmaður og vísað til ákvæðis í hegningarlögum sem heimilar að bætt sé við refsinguna allt að helming hennar, sé brotið framið af opinberum starfsmanni sem telja verður misnotkun á stöðu hans.
Málið verður þingfest í Héraðsdómi Reykjaness í lok ágúst næstkomandi.