Af nægu var að taka hjá Lögreglunni á höfuðborgarsvæðinu í gærkvöldi og í nótt. Fjölmargir voru handteknir vegna ölvunar- og/eða fíkniefnaaksturs í umdæminu. Þá var tilkynnt um innbrot á heimili og í bifreið í austurborginni í gærkvöldi með 14 mínútna millibili. Klukkan hálf fimm í nótt var tilkynnt um innbrot í leikskóla í póstnúmeri 108 í Reykjavík. Ekki kemur fram um hvaða leikskóla ræddi, en samkvæmt heimasíðu Reykjavíkurborgar eru níu leikskólar í póstnúmerinu.

Þá kom lögregla að því að brjóta upp slagsmál rétt fyrir miðnætti í miðborginni.

Klukkan hálf níu í gærkvöldi barst þá lögreglu tilkynning um að bifreið hefði verið ekið á ljósastaur í Mosfellsbæ. Kom á daginn að tveir einstaklingar voru í bílnum, báðir grunaðir um að vera undir áhrifum fíkniefna. Mennirnir voru ekki í bílnum þegar lögreglan kom á vettvang og vísuðu þeir hver á annan þegar spurt var hver hefði setið við stýrið. Segir í dagbókarfærslu lögreglunnar að báðir hafi verið handteknir og vistaðir í fangaklefa í þágu rannsóknar málsins.