„Ég tek að mér gigg þar sem ég er bókaður. Þeir sem hafa afbókað þurfa að svara því eftir réttum leiðum,“ segir Ingólfur Þórarinsson, Ingó Veðurguð, í stuttu spjalli við DV, en hann hefur verið afbókaður á marga viðburði í sumar eftir að baráttuhópurinn Öfgar birti 20 nafnlausar reynslusögur um meinta kynferðislega áreitni hans.

Ingó hefur látið í skína að lögsóknir séu í undirbúningi, bæði gegn þeim sem kunna að hafa farið fram úr sér í samfélagsumræðu um hann sem og þá aðila sem rift hafa samningum við hann um tónleikahald.

Aðspurður segist Ingó eingöngu vera bókaður í lokuð verkefni, þ.e. einkasamkvæmi en ekki opna viðburði. Hann segist ekki hafa mikið að gera.

Vísir.is fór yfir hvaða verkefni Ingó hefur misst undanfarið vegna umræðunnar. Staðfestir Ingó í samtali við Vísi að hann hafi verið afbókaður af mörgum tónleikum og hátíðum og hætt var við áform um framhald sjónvarpsþáttarins „Í kvöld er gigg“ á Stöð 2. Tekjutap tónlistarmannsins, sem átti líklega vinsælasta dægurlag síðasta sumars, „Í kvöld er gigg“, er því mjög mikið. Eins og alþjóð veit afbókaði Þjóðhátíðarnefnd Vestmannaeyja hann úr brekkusöngnum sem hann átti að stýra í ár eins og undanfarin ár.

„Það á enn eftir að koma í ljós hvernig það endar. En ég fer bara rétta leið með þetta mál,“ segir Ingó í við Vísir.is. Segist hann halda utan um öll verkefni sem hafa verið afbókuð.

Ingó ætlar að halda sínu striki og segist vera tilbúinn að spila fyrir þá sem bóka hann.