Í gær bárust fregnir af andláti þingmannsins Þórunnar Egilsdóttur en hún hafði glímt við krabbamein um nokkurt skeið. Hún hafði sagt sig frá þingstörfum í janúar í ár þegar hún greindist aftur með krabbamein eftir að hafa sigrast á því.

Þórunn sat á þingi fyrir Framsóknarflokkinn í Norðausturkjördæmi og hóf þingstörf árið 2013. Var hún á tímabili 1. varaforseti og var um tíma þingflokksformaður Framsóknarflokksins. Hún sat í hinum ýmsu nefndum innan þingsins og var hún um tíma formaður Íslandsdeildar NATO-þingsins.

Þórunnar verður sárt saknað og voru þeir ófáir sem minntust hennar á samfélagsmiðlum í gær. Nokkrir gamlir samstarfsfélagar hennar skrifuðu falleg orð og ljóst að Þórunn var vinamikil.

Sigurður Ingi Jóhannsson, formaður Framsóknarflokksins, segir að í baráttu Þórunnar við krabbameinið hafi hún náð að sýna alla sína helstu kosti, þar á meðal eldmóðinn og æðruleysið.

„Þórunn var vel gefin og stór kona með hugsjónir og húmor. Hún bar af og naut virðingar við sín störf, alltaf á vaktinni, alltaf til staðar og gat leitt saman ólík sjónarmið. Því er ég þakklát að fá að tipla með henni stíginn um stund,“ skrifaði Halla Signý Kristjánsdóttir, þingmaður Framsóknarflokksins.

Það eru ekki einungis flokkssystkini Þórunnar sem munu sakna hennar á Alþingi þar sem hún var þekkt fyrir að vera með eindæmum góð sál og tók vel á móti öllum.

Katrín Jakobsdóttir, forsætisráðherra, var stödd á Austurlandi þegar henni bárust fregnir af andláti Þórunnar en þær hittust þar oft þegar Katrín var á ferðalagi um landshlutann þar sem Þórunn bjó þar. Hún segir Þórunni hafa verið kjarnakona.