Dimitar Berbatov, sem lék með Manchester United, Tottenham og fleiri liðum á ferli sínum, vill sjá Kalvin Phillips spila með Manchester United í framtíðinni.

Hinn 25 ára gamli Phillips hefur komið mörgum á óvart með frammistöðu sinni á miðjunni hjá enska landsliðinu á Evrópumótinu sem nú stendur yfir.

Þá átti hann mjög flott tímabil með nýliðum Leeds í ensku úrvalsdeildinni á síðustu leiktíð.

,,Hann hefur verið einn af leikmönnum mótsins og fyrr eða síðar þá held ég að hann muni fara í stærra félag. Ég væri til í að sjá hann skrifa undir hjá Manchester United,“ sagði Berbatov.

Samningur Phillips við Leeds gildir til ársins 2024. Ef eitthvað félag vill næla í hann í sumar þarf líklega að borga ansi vel miðað við frammistöðu leikmannsins á EM.

Phillips verður í eldlínunni með Englandi á morgun í úrslitaleik Evrópumótsins gegn Ítalíu. Leikurinn hefst klukkan 19 að íslenskum tíma.