Tveir Norðmenn gerðu á fimmtudaginn ótrúlega uppgötvun þegar þeir voru í gönguferð í Mossemarka, sem er sunnan við Osló. Í helli fundu þeir gríðarlegt magn af peningaseðlum.

„Ég held að þetta séu rúmlega tvær milljónir króna,“ sagði annar mannanna, Ole Bisseberg, í samtali við VG.

Mennirnir höfðu samband við lögregluna sem tók peningana í sína vörslu og hóf rannsókn á málinu.

Hellirinn var notaður til að fela vopn þegar síðari heimsstyrjöldin stóð yfir en peningarnir eru nýlegir. Aðallega er um búnt með 1.000 króna seðlum að ræða. Þeir voru í svörtum ruslapoka. Þegar mennirnir höfðu talið 500.000 krónur hættu þeir að telja og höfðu samband við lögregluna.