Ásmundarsalsmálið svokallaða vakti mikla athygli á Þorláksmessu í fyrra en þá varð hópur fólks uppvís að því að brjóta sóttvarnarlög. Málið vakti sérstaka athygli þar sem Bjarni Benediktsson, fjármála- og efnahagsráðherra, var staddur í salnum þetta kvöld ásamt eiginkonu sinni.

RÚV greindi frá því að niðurstaðan væri komin í málið en í skriflegu svari frá Maríu Káradóttur, aðstoðarsaksóknara á ákærusviði lögreglunnar, segir að lögreglan geti ekki upplýst um afgreiðslu á einstökum málum. Samkvæmt heimildum Vísis er niðurstaðan sú að hlutaðeigandi aðilum hafi verið boðið að gangast undir lögreglustjórasátt, það er að greiða sekt innan ákveðins tímaramma.

Í samtali við Vísi segist Bjarni ekki hafa vitað af því að niðurstaða væri komin í málið. Þá segist hann ekki hafa verið til rannsóknar eftir hans vitund. „Ég er ekki aðili að málinu,“ sagði Bjarni í samtali við blaðamann Vísis.