Landsréttur staðsfesti í dag dóm yfir karlmanni sem braut siglingalög með því að vera undir áhrifum fíkniefna á meðan hann starfaði sem skipstjóri á fiskiskipi. Hann var dæmdur til að greiða 380.000 króna sekt til ríkissjóðs innan fjögurra vikna. Myndi hann ekki borga innan þess tímaramma biði hans 24 daga fangelsisdómur. Einnig var hann sviptur ökuréttindum í eitt ár og skipstjórnarréttindum í þrjá mánuði.
Dómur Héraðsdóms Norðurlands vestra féll í nóvember árið 2019, og varðaði einnig umferðarlagabrot mannsins. Hann áfrýjaði dómnum, og setti út á þann hluta er varðaði siglingalagabrotið, á þeim forsendum að í raun hafi hann ekki verið skipstjóri skipsins.
Maðurinn á að hafa siglt fiskiskipi um Skagafjörð og lagt því í bryggju í Sauðárkrókshöfn, undir áhrifum kannabisefna og metýlfenídat, sem er lyf sem svipar til amfetamíns. Í ljósi þess að hann var undir áhrifum efnanna þótti hann óhæfur til að sigla skipinu. Skipstjórinn sagðist hafa læknisfræðilegar forsendur til að taka metýlfenídatið sem lyf, og þá sagðist hann hafa reykt kannabis helgina áður en lögregla handtók hann.
Í dómnum kemur fram að maðurinn hafi fengið yfirstýrimann til að sigla skipinu, en undir sinni handleiðslu. Þó var hann sjálfur skráður sem skipstjóri og bar þar með ábyrgð á skipinu.
Í vitnaleiðslu sagðist yfirstýrmaðurinn í raun hafa verið skipstjóri í umræddri veiðiferð. Hann hafi siglt skipinu úr höfn en hann og ákærði hafi saman ákveðið hvar skyldi veiða. Yfirstýrmaðurinn hafði ekki áður verið í stýrishúsi, en hann átti að taka við skipinu um tíma meðan skipstjórinn færi í leyfi.
Yfirstýrmaðurinn kvaðst ekki hafa haft nokkra vitneskju um að skipstjórinn kynni að hafa verið undir áhrifum fíkniefna í þessari ferð, og hélt því fram að hann hefði ekki farið í ferðina hefði hann vitað það.
Lögreglunni höfðu borist tilkynningar um að umræddur skipstjóri sigldi skipinu oft undir áhrifum fíkniefna. Þegar skipið kom í land á Sauðarkróki hafi lögregla mætt á bryggjuna og handtekið manninn. Fram kmeur að ekki hafi sést á honum að hann væri undir áhrifum efna, en hann hafi verið samvinnuþýður. Úr honum voru tekin þvag- og blóðsýni sem sýndu fram á notkun á kannabisefna og metýlfenídat.
Þá kemur fram að í skýrslutöku hafi maðurinn ekki tekið fram að hann hefði ekki verið við stjórn skipsins. Hann sagði það hafa verið vegna þess að hann var ekki spurður.
Líkt og fram kemur hér að ofan þá staðfesti Landsréttur dóminn. Auk þess mun maðurinn þurfa að greiða allan áfrýjunarkostnað.
