Karlmanni, sem talið er að hafi þurft að sæta hrottalegum pyntingum hér á landi árið 2017, var neitað um réttargæslumann samkvæmt úrskurði Héraðsdóms Norðurlands eystra þann 1. júní. Landsréttur hefur nú fellt þá niðurstöðu úr gildi og gert héraðsdóm að skipa manninum réttargæslumann.

Samkvæmt úrskurði Landsréttar sem var birtur í dag hafa sex aðilar verið ákærðir fyrir frelsissviptingu, líkamsárás og hótanir. Þrjú þeirra fyrir hlutdeild í brotinu. En þau eru grunuð um að hafa þann 5. september 2017 svipt karlmann frelsi sínu og beitt hann hrottalegu ofbeldi og pyntingum.

Meðal þess sem þeim er gert að sök að hafa gert er að setja viskastykki eða klút yfir andlit mannsins og hellt vatni yfir vit hans, en þetta er þekkt pyntingaraðferð sem þykir afar hrottaleg.

Maðurinn er sagður hafa verið sviptur frelsi í fjórar klukkustundir og á þeim tíma var hann sparkað og stigið áf höfuð hans, hann sleginn ítrekað í höfuð og líkama og honum hótað frekara ofbeldi svo sem að honum yrði hent í sjóinn, fram af brú eða hann yrði meiddur með borvél og dúkahníf.

Samkvæmt úrskurði héraðsdóms neita allir ákærðu sök í málinu. Brotaþoli segist hafa orðið fyrir alvarlegum áverkum sem læknisfræðileg gögn sýni fram á en einn ákærðu sé barnsmóðir hans.

Héraðsdómur taldi ekki sýnt fram á að brotaþoli hefði sýnt fram á þörf fyrir sérstaka aðstoð réttargæslumanns í málinu og að ekki yrði framhjá því litið að hann nyti þegar liðsinnis lögmanns til að halda uppi bótakröfu í málinu.

Landsréttur taldi að læknisfræðileg gögn sýndu fram á að brotaþoli hafi orðið fyrir verulegu heilsutjóni og vottorð geðlæknis sýni fram á að hann glími við langvinnar afleiðingar vegna málsins, en maðurinn var öryrki fyrir árásina. Því telur Landsréttur að maðurinn hafi þörf fyrir réttargæslumann.

Samkvæmt fyrri fréttum af málinu er brotaþoli karlmaður á fimmtugsaldri og kom málið fyrst á borðlögreglu eftir að hann leitaði sjálfur aðstoðar á Sjúkrahúsi Akureyrar, daginn eftir árásina. Í kjölfarið voru fjórir aðilar úrskurðaðir í gæsluvarðhald, þrír karlmenn og ein kona. Öll höfðu þau komið við sögu lögreglu áður, sum ítrekað.